ДУИ: Владата изгуби 60,77 милиони евра европски грант за Коридорот 8

Демократската унија за интеграција (ДУИ) обвини дека Владата изгубила 60,77 милиони евра неповратни средства од Европската Унија, наменети за изградба на третата делница од железничкиот Коридор 8 кон Бугарија.

Од партијата велат дека, според официјалните документи доставени од Владата до Собранието, средствата од ИПА-програмата повеќе не се достапни, бидејќи тендерската постапка објавена во 2024 година била поништена, а договорот за изградба не бил склучен во предвидениот рок.

— реклама —

Според ДУИ, не станува збор само за изгубени финансиски средства, туку и за пропуштена можност за економски развој, модернизација на железничката инфраструктура и подобро поврзување на земјата со европските транспортни коридори.

— реклама —

Партијата потсетува дека на крајот од 2023 година, кога била дел од Владата, за проектот бил обезбеден финансиски пакет вреден околу 560 милиони евра, кој вклучувал кредити од Европската инвестициска банка и Европската банка за обнова и развој, грант од Инвестициската рамка за Западен Балкан (WBIF) и ИПА-грант од Европската Унија во висина од 60,77 милиони евра.

Од ДУИ тврдат дека уште претходно предупредувале оти Коридорот 8 нема да биде приоритет на актуелната Влада и дека одложувањето на проектот ќе резултира со губење на европските средства.

— реклама —

Партијата оценува дека Коридорот 8 претставува стратешки проект не само за државата, туку и за Европската Унија и НАТО, бидејќи го поврзува Јадранското со Црното Море и има значајна улога во регионалната поврзаност и безбедност.

ДУИ побара Владата да одговори кој ќе сноси одговорност за изгубениот грант, зошто не биле испочитувани роковите за реализација на проектот и дали средствата што требало да бидат обезбедени како европски грант сега ќе треба да се покриваат од државниот буџет.

Од партијата порачаа дека ќе продолжат да се залагаат за реализација на Коридорот 8, оценувајќи дека станува збор за проект од стратешко значење за државата, а не за интерес на која било политичка партија.