ДУИ: ВЛЕН со дискриминаторско, незаконско и условено решение за албанските ученици во Бутел

ДУИ преку соопштение реагира на договорот меѓу Министерството за образование и Општина Бутел за уписот на албанските ученици во ООУ „Петар Здравковски – Пенко“, оценувајќи дека предложеното решение ги ограничува нивните права на образование на мајчин јазик.

— реклама —

Од партијата велат дека, според презентираниот договор, учениците од Чаир кои живеат во близина на училиштето ќе можат да се запишат во прво одделение само доколку имаат брат или сестра кои веќе учат во училиштето. Во исто време, не е предвидено отворање нова паралелка на албански јазик.

„Ова не е решение. Ова е начин да се ограничи и услови правото на албанските деца на образование на мајчин јазик“, велат од ДУИ.

— реклама —

Од партијата прашуваат зошто запишувањето на едно дете треба да зависи од тоа дали негов брат или сестра веќе посетува настава во училиштето и бараат институциите да ги објават точниот број на ученици кои побарале упис и критериумите според кои е донесена одлуката.

— реклама —

ДУИ бара да се гарантира уписот на сите ученици кои ги исполнуваат законските услови, како и отворање паралелка на албански јазик доколку има доволен број заинтересирани ученици.

„Ако има 25 или повеќе албански деца кои сакаат да учат на албански јазик, треба да се отвори паралелка на албански јазик. Точка“, порача партијата.

Од ДУИ додаваат дека образованието е право и не смее да зависи од политички договори или дополнителни услови кои, според нив, не се применуваат еднакво за сите ученици.