Демократската унија за интеграција (ДУИ) реагира на обвинувањата од коалицијата ВЛЕН, оценувајќи дека тие се обидуваат да го прикријат, како што наведуваат, недостатокот на етнички легитимитет преку политички напади и клевети кон партијата.
Од ДУИ посочуваат дека изјавите на министерот Горан Минчев и на Изет Меџити, според нив, покажуваат дека ВРЕДИ нема доволна поддршка за носење на Законот за правична и соодветна застапеност со Бадентерово мнозинство.
Партијата наведува дека наместо да одговори на критиките за предложеното законско решение, ВРЕДИ се обидува да ја пренасочи јавната дебата со политички обвинувања кон ДУИ.
Според ДУИ, предложениот закон не содржи обврзувачки механизми, санкции и гаранции за спроведување на правичната и соодветната застапеност, поради што партијата нема да го поддржи.
„Да се брани Охридскиот рамковен договор и уставните гаранции не е блокада, туку политичка и национална одговорност“, се наведува во соопштението.
Од ДУИ додаваат дека ВРЕДИ претходно најавувал решение кое ќе биде посилно од Балансерот, а сега, според нив, предлага закон кој е послаб од постојниот систем.
Во реакцијата се наведува дека, доколку ВРЕДИ смета дека предложениот закон е квалитетен, треба да го брани пред граѓаните, оценувајќи дека барањето поддршка од опозицијата е доказ за недостиг на политички легитимитет и доверба.
