Од ДУИ наведуваат дека вчерашната објава на пратеник од „Вреди“, со која се обидел како успех да го прикаже двојазичното објавување документи во „Службен весник“, завршила како јавен доказ за, како што велат, неспроведување на Законот за јазиците од страна на институциите.
Од партијата посочуваат дека „Службен весник“ не функционира по политичка желба или моментален каприц, туку има законска обврска објавите да ги публикува на два јазика, согласно важечкиот правен поредок.
Од таму оценуваат дека пратеникот на „Вреди“, во обид да се пофали, всушност промовирал примена на законска обврска што, според нив, институциите секојдневно ја оспоруваат.
Од ДУИ додаваат дека, со споредбите што биле направени со други институции, јавно се потврдило оти дел од нив не ја почитуваат законската обврска за употреба на албанскиот јазик.
Според партијата, тоа покажува дека проблемот не е во толкувањето на законот, туку во неговото неспроведување.
Од ДУИ порачуваат дека Владата и Претседателката не можат да се кријат зад, како што велат, пропагандата на своите пратеници, и дека кога целта е манипулација со јавноста, вистината излегува на површина.
Тие додаваат дека со ова, „Вреди“ потврдил дека албанскиот јазик се потиснува од институциите преку систематско неспроведување на законот.
На крајот, од ДУИ бараат целосно и итно почитување на Законот за употреба на јазиците од секоја државна институција, без исклучок.
