Демократската унија за интеграција (ДУИ) преку соопштение повторно упати критики до Инспекторатот за употреба на јазиците, обвинувајќи го дека не реагира поради, како што наведуваат од партијата, непочитувањето на Законот за употреба на јазиците од страна на Град Скопје.
Во соопштението, ДУИ тврди дека Инспекторатот веќе втор ден не постапува, иако, според нив, градоначалникот на Скопје не ги исполнил законските обврски поврзани со употребата на албанскиот јазик.
Од партијата оценуваат дека Инспекторатот има законска обврска да утврдува евентуални прекршувања, да наложува нивно отстранување и да презема мерки во согласност со своите надлежности, поради што бараат институцијата веднаш да отвори инспекциска постапка.
ДУИ бара официјално да се утврди дали има прекршување на законот, да се наложи негова итна корекција, да се преземат законски мерки против одговорните лица и јавноста да биде информирана за преземените активности.
Воедно, од партијата наведуваат дека доколку директорот на Инспекторатот не е подготвен или не е способен да ги извршува своите законски надлежности, треба да поднесе оставка.
Во соопштението ДУИ додава дека ќе продолжи да ги користи сите законски, институционални и политички механизми за, како што наведуваат, целосно почитување на Законот за употреба на јазиците и обезбедување еднаков третман на албанскиот јазик во институциите на Град Скопје.
