ДУИ: За Шасивари скандалите немаат крај. Според него, единствен правен јазик е македонскиот јазик

Демократската унија за интеграција (ДУИ) преку соопштение го обвини министерот за правда Јетон Шасивари дека со својот пристап кон полагањето на правосудниот испит на албански јазик создава нови проблеми наместо да понуди решение.

— реклама —

Од партијата велат дека се противат на, како што наведуваат, обидите за кршење на Уставот и Законот за употреба на јазиците. Според ДУИ, ставот на министерот остава впечаток дека македонскиот е единствениот правен јазик, додека употребата на албанскиот се третира како прашање што треба дополнително да се уредува со подзаконски акти.

— реклама —

Од ДУИ ја критикуваат и средбата на Шасивари со студентите, оценувајќи дека разговорите и консултациите не можат да се претставуваат како успех ако не доведат до конкретно решение.

— реклама —

„Министерот за правда се претвора во министер за средби! Средби, консултации, разговори и ветувања, но албанските студенти и понатаму се соочуваат со истата пречка: неможноста да го полагаат правосудниот испит на албански јазик“, се наведува во реакцијата.

Партијата нагласува дека уставните права не смеат да зависат од волјата на министерот или од толкувањето на подзаконските акти. Од ДУИ бараат целосно решение за полагањето на правосудниот испит на албански јазик, во согласност со Уставот и законите, оценувајќи дека станува збор за прашање на еднаквост, а не за компромис.