Два патнички авиона добиле дојави за бомби на летовите кон Варшава

Два патнички авиона на летовите кон Варшава добиле дојави за поставени бомби, по што биле преземени безбедносни мерки на двата полски аеродрома.

— реклама —

Авион на полската компанија „ЛОТ“, кој летал од Лондон кон Варшава, бил пренасочен кон аеродромот Модлин, каде што безбедно слетал во 10:01 часот по локално време. Во леталото имало 181 лице, а по слетувањето започнале нивна евакуација и проверка на авионот од страна на полицијата и специјализираните служби за експлозиви.

Поради инцидентот, аеродромот Модлин е затворен до понатамошно известување. Дојавата за можна експлозивна направа била примена само седум минути пред слетувањето. Засега нема потврда дека во авионот навистина имало бомба, ниту е познато кој ја испратил заканата.

— реклама —

— реклама —

Речиси истовремено, дојава за бомба добил и авион на компанијата „САС“, кој летал од Копенхаген кон Варшава. Тој слетал на аеродромот „Шопен“, каде што бил подложен на безбедносна проверка. Од управата на аеродромот соопштиле дека воздушниот сообраќај се одвива без застои.

Инцидентот следува еден ден по слична закана за авион на „Виз ер“ на летот од Лондон кон Софија, кој бил пренасочен кон Будимпешта. Унгарија тогаш испратила борбен авион „Грипен“ да го придружува патничкиот авион до безбедно слетување. Подоцнежните извештаи покажале дека заканата била лажна.

— реклама —