Дваесетгодишен жител на кривопаланечкото село Узем е лишен од слобода откако управувал четирицикл без возачка дозвола и предизвикал сообраќајна несреќа во која тешко е повредена малолетна сопатничка.
Како што информираат од Министерството за внатрешни работи, на 24 јуни околу 19:30 часот полициски службеници од СВР Охрид го привеле И.П. (20) од село Узем.
Претходно, на локалниот пат меѓу охридските села Горно и Долно Коњско, управувајќи четирицикл со охридски регистарски ознаки, тој изгубил контрола над возилото и излетал од коловозот.
Во несреќата тешки телесни повреди добила 16-годишна сопатничка од селото Марино, општина Илинден. Повредите биле констатирани во Специјалната болница „Св. Еразмо“ во Охрид.
По наредба на јавен обвинител, увид на местото извршила екипа на СВР Охрид, при што било утврдено дека возачот го управувал четирициклот без да поседува возачка дозвола.
По целосно документирање на случајот, против него ќе биде поднесена соодветна пријава.
