Двајца малолетници тешко повредени во несреќи со електрични тротинети

Двајца малолетници се здобиле со тешки телесни повреди во одделни несреќи со електрични тротинети што се случиле во Неготино и Кичево.

— реклама —

Како што информираат од Министерството за внатрешни работи, на 24 мај околу 14 часот во ОВР Неготино било пријавено дека на крстосницата од улиците „Климентова“ и „Дојранска“ во Неготино 16-годишник од Неготино, управувајќи електричен тротинет, паднал на коловозот.

— реклама —

Во несреќата тој се здобил со тешки телесни повреди, констатирани во Општата болница во Кавадарци. За случајот бил известен јавен обвинител, а увид извршила екипа од ОВР Неготино.

Во вториот случај, пријавен истиот ден во 12:25 часот во ОВР Кичево, на локалниот пат кон „Нова населба“ во село Зајас се случила сообраќајна несреќа помеѓу патничко возило „Рено“ со кичевски регистарски ознаки, управувано од Ф.Џ. (32) од село Горно Строгомиште и електричен тротинет, управуван од 15-годишник од Зајас.

— реклама —

Во судирот малолетникот се здобил со тешки телесни повреди, констатирани во Медицинскиот центар во Кичево.

За настанот бил известен јавен обвинител, а увид извршила увидна екипа од ОВР Кичево.