Две малолетни девојки се осомничени дека во центарот на Белград со нож нападнале и повредиле 18-годишна девојка, која по нападот била оставена на улица.
Инцидентот се случил вчера околу еден час по полноќ во улицата „Браќа Крсмановиќ“. Според информациите, две девојки ја нападнале 18-годишната А. М. и ѝ нанеле убодни повреди, по што побегнале од местото.
Полицијата веднаш започнала истрага, а припадниците на Полициската станица Савски Венац, во соработка со Управата за криминалистичка полиција, набрзо го расчистиле случајот.
За нападот е уапсена 15-годишна девојка поради сомнение за насилничко однесување. Таа, по налог на Вишото јавно обвинителство во Белград, била испитана во присуство на родител.
Втората осомничена има само 13 години и поради возраста не подлежи на кривична одговорност. Со неа ќе биде спроведен разговор во присуство на родител, а случајот е предаден на Центарот за социјална работа.
По нападот, двете девојки наводно се обиделе да ги сокријат трагите. Ножот со кој била повредена 18-годишната девојка го скршиле и го фрлиле на подрачјето на Стар Град.
Полицијата го пронашла скршениот нож и го иззела како доказ во истрагата.
