Откажувањето од шеќерот стана еден од најпопуларните трендови на социјалните мрежи, но експертите предупредуваат дека не сите видови шеќер се штетни и дека промените во исхраната треба да се прават внимателно и постепено.
Симулацијата на „GrowFit Health“, која не е професионална медицинска институција, прикажува како телото може да реагира во текот на две недели без внесување на таканаречените „слободни шеќери“ – односно шеќерите што се додаваат во храната и пијалаците.
Во првите два дена, според симулацијата, нивото на шеќер во крвта почнува да се стабилизира, што може да резултира со помалку ненадејни падови и скокови на енергијата.
Од третиот до шестиот ден, кај многумина може да се јави силна желба за благо. Во овој период се можни и промени во расположението, анксиозност, проблеми со спиењето, намалена концентрација, желба за јаглехидрати, како и главоболки, вртоглавица, мачнина и замор.
Експертите препорачуваат шеќерот да не се исфрла нагло, туку постепено да се намалува неговиот внес за да се избегнат поизразени симптоми.
Од седмиот до деветтиот ден, вкусните рецептори почнуваат да се приспособуваат, па многумина забележуваат дека природно слатките намирници, како овошјето, имаат поинтензивен вкус.
Кон крајот на втората недела, односно од десеттиот до четиринаесеттиот ден, според симулацијата, енергијата се стабилизира и се зголемува, а телото станува поефикасно во искористувањето на масните резерви како извор на енергија.
Сепак, здравствените власти потсетуваат дека природните шеќери што се наоѓаат во овошјето, зеленчукот и млекото не треба да се изедначуваат со додадените шеќери.
Според препораките на Националната здравствена служба на Велика Британија, возрасните не треба да внесуваат повеќе од 30 грама слободни шеќери дневно, а пред воведување поголеми промени во исхраната се препорачува консултација со лекар или нутриционист.
