Двете жртви во Ѓорче Петров биле врзувани пред смртта, на нив имале траги од насилство – се испитуваат сличностите

Двата смртни случаи со траги од насилство во скопската општина Ѓорче Петров имаат сличности што отвораат прашања дали зад нив стои ист сторител, дознава „Скопје1“ од извори запознаени со истрагата. Според неофицијалните информации, и 76-годишната жена и 62-годишниот маж биле изложени на насилство пред смртта, а кај двајцата имало траги што упатуваат на врзување.

Жителите на улицата „Ѓурчин Кокале“, каде што живеела 76-годишната жена, се вознемирени од информациите што кружат низ населбата. Меѓу соседите се зборува дека жената била врзана, а потоа убиена при грабеж. Овие информации засега не се официјално потврдени, ниту е утврден мотивот за нејзината смрт.

— реклама —

Според сознанијата на „Скопје1“, жената живеела сама во куќата, а без знаци на живот ја пронашла нејзината ќерка, која денеска, 27 октомври, во 09:18 часот го пријавила случајот во полиција. Екипа на Итната медицинска помош констатирала смрт со видливи траги од насилство, по што, по насоки на јавен обвинител, телото било предадено на обдукција.

Слични околности, според изворите на „Скопје1“, биле забележани и кај 62-годишниот маж, пронајден починат во својот дом во Ѓорче Петров на 22 октомври. Неофицијално, и тој бил врзуван за нозете пред смртта.

— реклама —

Полицијата од пријавувањето на првиот случај презема дејствија за утврдување на причините и околностите на смртта, како и за откривање евентуален сторител и мотив.

Изворите на „Скопје1“ наведуваат дека во ниту еден од двата случаи не било употребено огнено оружје. Според истите информации, постојат индиции за употреба на друг предмет при нанесувањето на смртоносните повреди, но засега нема официјална потврда за видот на предметот, ниту за точниот механизам на смртта.

Од Јавното обвинителство претходно за „Скопје1“ посочија дека засега не е утврдена поврзаност меѓу двата случаи.

— реклама —

„За да се утврди евентуална поврзаност мора да се открие кој е сторител“, велат од Обвинителството.

„Скопје1“ побара информации и од Министерството за внатрешни работи за тоа дали е пристигнат обдукцискиот наод за 62-годишниот маж, но засега нема одговор.

Неофицијалните информации се дека во станица било приведено лице, додека МВР вели само дека работи на случаите во континуитет.

Има приведен за смртниот случај во Ѓорче Петров – се работи на расчистување на насилната смрт

Приведено е лице во врска со смртта на две лица на 62- и 76-годишна возраст, чии тела со траги на насилство беа пронајдени на 22 и 27 октомври во скопската населба Ѓорче Петров. Неофицијално, лицето било приведено во околината на населбата и во моментов се наоѓа во полициската станица Карпош.Од МВР засега не откриваат повеќе детали. Оттаму информираат дека СВР Скопје, во координација со Основното јавно обвинителство Скопје, презема интензивни мерки и активности за расчистување на случајот.

Македонија | пред 5 часа