Сите четворица уапсени за двата смртни случаи во Ѓорче Петров признале вина за убиствата

Сите четворица приведени за двата случаи на разбојништво со смртни последици во скопските населби Хром и Ѓорче Петров признале вина, дознава „Скопје1“ од извори во Министерството за внатрешни работи.

Според информациите до кои дојде „Скопје1“, полицијата успеала да ги лоцира осомничените во текот на вчерашниот ден, па да утврди кои други лица биле инволвирани во двата случаи, во кои животот го загубија 62-годишен маж и 76-годишна жена.

— реклама —

Изворите наведуваат дека тројца од приведените биле директно вклучени во извршувањето на делата, додека за четвртото лице постои можност да одговара за помагање. Сепак, конечната правна квалификација и улогата на секој од осомничените ќе бидат предмет на оценка на надлежниот јавен обвинител.

Познато е дека тие се извршители на двете убиства. Целта била да се ограбат жртвите, кои кај себе имале пари. Неофицијално, тие биле врзувани и измачувани пред да бидат ликвидирани.

— реклама —

МВР претходно официјално соопшти дека се приведени А.С. (22), Х.Е. (20) и К.А. (58), сите од Скопје, како и М.Р. (26) од Струмица. Четворицата се осомничени за две кривични дела „разбојништво“ со смртни последици, според член 237 став 5 од Кривичниот законик.

— реклама —

Првиот случај се случи на 22 октомври во Хром, каде што во својот дом беше пронајден починат 62-годишниот С.Ј., со траги од насилство. Пет дена подоцна, на 27 октомври, 76-годишната О.А. беше пронајдена мртва во куќа на улицата „Ѓурчин Кокале“ во Ѓорче Петров. Нејзината ќерка го пријавила случајот во полиција.

„Скопје1“ претходно објави, повикувајќи се на извори запознаени со истрагата, дека двете жртви биле изложени на насилство пред смртта и дека постоеле сличности во начинот на извршување на делата, вклучително и траги што упатувале на врзување.

Од Основното јавно обвинителство Скопје за „Скопје1“ потврдија дека за четворицата е побаран краткотраен притвор, согласно Законот за кривичната постапка, со цел комплетирање на доказниот материјал.

Информациите за признанијата засега се неофицијални и не се потврдени со јавно соопштение од Обвинителството. Дополнително треба да се утврдат индивидуалната одговорност на осомничените, мотивите и точните околности под кои биле извршени делата.