За убиствата на жената и мажот во Ѓорче Петров има четири уапсени: најмладиот има 22 години, највозрасниот 58 години

Четири лица се уапсени под сомнение дека стојат зад двата случаи на разбојништво со смртни последици во скопските населби Хром и Ѓорче Петров, во кои на 22 и 27 октомври беа пронајдени починати 62-годишен маж и 76-годишна жена со траги од насилство. Министерството за внатрешни работи потврди дека осомничените се лишени од слобода, додека Јавното обвинителство за „Скопје1“ соопшти дека за нив е побаран краткотраен притвор.

Станува збор за А.С. (22), Х.Е. (20) и К.А. (58), сите од Скопје, како и М.Р. (26) од Струмица. Четворицата биле уапсени во текот на вчерашниот ден, 27 октомври.

— реклама —

„СВР Скопје во текот на вчерашниот ден (27.10.2026) лиши од слобода четири лица, А.С.(22), Х.Е.(20), К.А.(58) сите од Скопје и М.Р.(26) од Струмица, кои се сомничат за двете кривични дела „разбојништво“ со последица смрт по член 237 став 5 од Кривичниот законик извршени на територија на скопски Хром на 22.10.2026 и Ѓорче Петров на 27.10.2026“, соопштија од МВР.

Од Основното јавно обвинителство Скопје за „Скопје1“ потврдија дека се издадени наредби за прибирање и комплетирање на доказниот материјал, а за осомничените е побаран краткотраен притвор.

— реклама —

„Како што веќе ве извести и МВР, лишени се од слобода 4 лица и по издадени Наредби од ОЈО Скопје, а со цел комплетирање на целокупниот доказен материјал за понатамошна постапка, за лицата е побаран краткотраен притвор согласно член 170 вв член 165 од Законот за кривична постапка“, велат од Обвинителството за „Скопје1“.

По комплетирањето на доказите, според МВР, ќе биде поднесена соодветна кривична пријава.

Првиот случај беше пријавен на 22 октомври, кога 62-годишниот С.Ј. беше пронајден починат во својот дом на подрачјето на Хром. Лекар од Итната медицинска помош констатираше смрт со траги од насилство, а телото беше предадено на обдукција.

— реклама —

Пет дена подоцна, на 27 октомври, во куќа на улицата „Ѓурчин Кокале“ во Ѓорче Петров беше пронајдена почината 76-годишната О.А. Нејзината ќерка го пријавила случајот во полиција во 09:18 часот, откако ја затекнала мајка си без знаци на живот. И на телото на жената биле забележани видливи траги од насилство.

„Скопје1“ претходно објави, повикувајќи се на извори запознаени со истрагата, дека во двата случаи постоеле сличности во начинот на постапување со жртвите. Според неофицијалните сознанија, двете лица биле изложени на насилство и имале траги што упатувале на врзување.

Од Обвинителството претходно посочија дека за да се утврди евентуална поврзаност меѓу случаите, најнапред треба да се открие сторителот. Со денешното соопштение на МВР, четири лица се осомничени за двете разбојништва со смртни последици.

Засега надлежните не соопштуваат дополнителни детали за улогата на секој од осомничените, начинот на извршување на делата и доказите што се обезбедени. Постапката продолжува под надзор на Основното јавно обвинителство Скопје.