ДЗР: Ревизијата на АВРМ откри нерамномерна распределба на над 23 милиони евра за вработување

Државниот завод за ревизија утврдил низа неправилности во работењето на Агенцијата за вработување на Република Македонија (АВРМ) за 2024 година, меѓу кои и нерамномерна распределба на средствата за активните мерки за вработување по планските региони.

Ревизорите изразиле мислење со резерва за финансиските извештаи и неповолно мислење за усогласеноста на работењето со законската регулатива.

— реклама —

Во текот на 2024 година за активните програми и мерки за вработување биле исплатени 1,44 милијарди денари, односно околу 23,4 милиони евра. Според ревизијата, распределбата на средствата не го следела принципот на рамномерен регионален развој, бидејќи најголем дел од средствата биле концентрирани во неколку градови.

Кај мерката за самовработување, 62,05 проценти од средствата биле реализирани преку центрите за вработување во само пет градови. Над половина од одобрените апликации за мерките за субвенционирање плати и поддршка за раст на правни субјекти биле концентрирани во Скопје, Тетово, Струга, Куманово и Пробиштип.

— реклама —

Ревизорите констатирале и слабости во контролата на трошењето на средствата поради недоволно разработени процедури, ретки теренски контроли и нецелосна документација, што создава ризик од нивно ненаменско користење.

Во извештајот се наведува дека во 2024 година биле исплатени околу 21,5 милиони евра за паричен надоместок при невработеност, што е за повеќе од 27 проценти повеќе во споредба со претходната година. Притоа биле утврдени слабости во постапките за остварување на ова право, како некомплетна документација, недоволна електронска размена на податоци и отстапувања при пресметката на надоместоците.

— реклама —

Ревизијата открила и случаи на договори за вработување на определено време склучени на само три дена, продолжување на договори над законскиот рок, како и повторно вработување кај ист работодавач по користење на правото на паричен надоместок.

Дополнително, било утврдено дека само 184 од вкупно 735 кандидати, односно околу 25 проценти, успешно го положиле завршниот испит во програмата за обука за напредни ИТ-вештини, што, според ДЗР, укажува на ниска ефикасност на мерката.

Ревизорите констатирале и неправилности при ангажирањето адвокатски услуги и вештачења, како и дека Посебниот фонд за вработување на инвалидни лица и натаму не ги добива средствата што му следуваат согласно со закон.

За надминување на утврдените слабости, Државниот завод за ревизија доставил препораки до надлежните институции за подобрување на контролите, законската рамка и распределбата на средствата.