СДСМ преку соопштение оценува дека најновото поскапување на горивата дополнително ќе го влоши животниот стандард на граѓаните и ја обвинува Владата дека не презема мерки за ублажување на последиците од растот на цените.
Во партиското соопштение се наведува дека поскапувањето на дизелот за 5,5 денари по литар неминовно ќе предизвика нов бран зголемувања на цените на храната и другите основни производи. Од СДСМ посочуваат дека транспортот и земјоделството директно зависат од цената на дизелот, поради што очекуваат повисоки цени во маркетите и на пазарите.
Партијата тврди дека Владата на премиерот Христијан Мицкоски не презела никакви мерки за да го ублажи товарот врз граѓаните и оценува дека последиците најмногу ги чувствуваат работниците, пензионерите, земјоделците и семејствата со пониски приходи.
Во соопштението се наведува и дека Владата не покажала подготвеност за разговор со синдикатите околу нивното барање за зголемување на минималната плата на 600 евра. Дополнително, СДСМ тврди дека веќе две и пол години нема зголемување на ниту едно социјално право, вклучително и надоместоците за лицата со попреченост, гарантираната минимална помош и социјалната пензија.
Од СДСМ посочуваат дека синдикалната потрошувачка кошничка во последните две години е зголемена за околу 10.000 денари и дека веќе надминува 70.000 денари, поради што, според партијата, сè повеќе граѓани тешко ги покриваат основните животни трошоци.
Во продолжение, партијата оценува дека наместо конкретни економски мерки за намалување на ценовниот притисок, Владата се обидува да ја промени методологијата за пресметка на трошоците за живот. Според СДСМ, економската состојба се влошува, а Владата не презема соодветни чекори за заштита на животниот стандард на граѓаните.
