Борбата со летните горештини е во полн ек, а за многумина првиот избор за разладување е вентилаторот. Сепак, експертите предупредуваат дека вентилаторите не се секогаш ефикасни и дека при екстремно високи температури можат дури и да бидат штетни.
Британската агенција за здравствена безбедност наведува дека вентилаторите можат да помогнат во циркулацијата на воздухот кога температурата е под 35 Целзиусови степени. Но, кога температурите ќе ја надминат оваа граница, тие можат само да го разнесуваат топлиот воздух низ просторијата, без да го разладат телото, а воедно можат и да ја влошат дехидратацијата.
Експертите советуваат во текот на најтоплиот дел од денот да бидат затворени прозорците, ролетните и завесите, особено на страната од домот изложена на сонце. На тој начин се спречува загревањето на просториите и се одржува пониска температура во внатрешноста.
Се препорачува и намалување на користењето електрични уреди, бидејќи тие дополнително ја загреваат просторијата. Во периодот меѓу 11 и 15 часот најдобро е да се остане во затворен простор и да се избегнува директно изложување на сонце.
Хидратацијата е особено важна за време на топлотните бранови. Стручњаците советуваат редовно внесување течности, консумирање ладна храна и избегнување алкохол, кофеин и топли напивки.
За полесно заспивање во жешките ноќи, се препорачува спалната соба да се одржува што е можно поладна, а вечерата да се консумира најмалку два часа пред спиење. Дополнително, ладен туш или ладни облоги можат да помогнат во намалувањето на телесната температура.
Според експертите, комбинацијата од правилно проветрување, заштита од сонцето и редовна хидратација е клучна за полесно справување со екстремните летни температури.
