Тројца припадници на јужнокорејската армија се повредени денеска во експлозија за време на операција во западниот дел на Демилитаризираната зона (ДМЗ), која ги раздвојува Јужна и Северна Кореја, соопшти Здружениот штаб на јужнокорејските вооружени сили.
Двајца од повредените биле евакуирани со хеликоптер, додека третиот треба да биде пренесен по копнен пат, по што и тој ќе биде евакуиран со хеликоптер. Засега нема дополнителни информации за нивната здравствена состојба.
Јужнокорејските медиуми објавија дека експлозијата можеби била предизвикана од мина. Инцидентот се случил јужно од демаркациската линија, во рамките на ДМЗ.
Експлозии на мини и други направи повремено се случуваат во и околу демилитаризираната зона, при што во минатото биле повредувани и припадници на вооружените сили на двете страни.
Границата меѓу двете Кореи е строго обезбедувана уште од Корејската војна од 1950 до 1953 година, која завршила со примирје, но не и со мировен договор.
Според медиумски информации, севернокорејските сили во март продолжиле со утврдување на своите позиции, вклучително и со поставување мини и подигнување огради.
Јужнокорејскиот пратеник Ју Јонг-вон претходно овој месец изјавил дека минските полиња и други севернокорејски објекти на шест локации во западниот дел на ДМЗ ја преминуваат демаркациската линија за околу 10 до 15 метри.
