Јужна Кореја претстави амбициозна стратегија за развој на седум клучни технологии со кои земјата сака да обезбеди нови извори на економски раст и да ја намали зависноста од полупроводниците и вештачката интелигенција.
Иницијативата „Seven Major SEED“ беше претставена на состанок во Плавата куќа, со кој претседаваше претседателот Ли Џе Мјунг. Планот предвидува комерцијална употреба на домашни мали модуларни нуклеарни реактори до 2035 година, слетување на Месечината до 2030 година и развој на домашен квантен компјутер со 100 кубити до 2029 година.
Меѓу целите е и комерцијализација на технологија за поврзување на мозокот со компјутер до 2035 година.
Стратегијата опфаќа седум области: мали модуларни реактори, нуклеарна фузија, нова генерација обновливи извори на енергија, квантна технологија, вселенски и воздухопловен сектор, напредна биотехнологија и синџири на снабдување со критични минерали и материјали.
Јужнокорејската влада ја претставува иницијативата како стратешка инвестиција во идниот економски развој и националната безбедност, во услови на забавување на долгорочниот економски раст и сè поголема глобална конкуренција во напредните технологии.
Министерот за наука Бе Кјунг-хун порача дека целта е овие проекти да се развијат во технологии со кои Јужна Кореја во следните една до две децении ќе може да стане една од водечките земји во светот.
