Зајакнувањето на Ел Нињо може значително да ги промени временските услови во различни делови на светот во наредните месеци, со зголемен ризик од суши, поплави, силни бури и дополнително зголемување на температурите.
Генералниот секретар на Обединетите нации, Антонио Гутереш, предупреди дека влијанијата на феноменот веќе почнуваат да се чувствуваат на глобално ниво.
„Ел Нињо се зголемува пред нашите очи. Науката не остава простор за сомнеж: планетата е во неистражени води, а тие води се загреваат“, рече Гутереш.
Светската метеоролошка организација (СМО) ги објави најновите податоци, според кои актуелниот Ел Нињо би можел да биде еден од најсилните во последните седум децении и да продолжи најмалку до февруари 2027 година.
Ел Нињо се развива во Тихиот Океан и е поврзан со промени во воздушните струења и ширењето на топлите океански води кон источниот дел на Пацификот. Со тоа се ослободува дополнителна топлина во атмосферата и се менуваат временските обрасци на глобално ниво.
Во клучниот регион за следење на феноменот, температурата на површината на морето во последните недели била повеќе од два степени Целзиусови над просекот. Според прогнозите, месечните температури би можеле да достигнат речиси четири степени над просечните вредности, што би го направило овој Ел Нињо најсилен од почетокот на современите мерења во 1950 година.
Уште поголеми отстапувања се забележуваат под површината на океанот, каде што на одредени места температурите се повеќе од осум степени над просекот. Надпросечни температури на морето се очекуваат и во други области, меѓу кои Индискиот Океан, тропскиот Атлантик и делови од австралискиот брег.
СМО предупредува дека Ел Нињо може да има сериозни последици за заедниците и економиите, бидејќи феноменот носи различни временски услови во зависност од регионот. Додека некои подрачја може да се соочат со суши, други би можеле да бидат погодени од пообилни врнежи, поплави и силни тропски бури.
Според прогнозите, во наредните месеци посуви услови се очекуваат во големи делови од Југоисточна Азија, Централна Америка и северните делови на Јужна Америка. Тоа би можело да го зголеми ризикот од суши и шумски пожари.
СМО соопшти дека ги засилува активностите за навремено доставување прогнози и предупредувања за можните екстремни временски услови до што поголем број заедници.
„Ел Нињо има потенцијал да им нанесе огромен удар на заедниците и економиите низ целиот свет“, предупреди генералната секретарка на СМО, Селесте Сауло.
