Електронски алки за следење на насилниците и отстранување од домот на 48 часа предвидуваат новите законски измени за заштита од семејно насилство

Електронско следење на сторителите и можност полицијата да ги отстранува од домот, дури и кога се негови сопственици, се дел од предложените измени на Законот за спречување и заштита од насилство врз жените и семејно насилство.

Со измените се прецизираат надлежностите на институциите за спроведување на итните и привремените мерки. Министерството за внатрешни работи ќе биде надлежно за најголем дел од нив, Министерството за здравство за одредена мерка, а советувалиштата за сторители ќе спроведуваат мерки за нивно советување.

— реклама —

Предвидена е и можност, со судска одлука, одредени мерки да се спроведуваат со електронски алки за следење на сторителите.

— реклама —

Една од позначајните новини е можноста полициски службеник, доколку утврди сериозен ризик за безбедноста на жртвата, веднаш да нареди отстранување на насилникот од домот, без оглед дали тој е сопственик на недвижноста. Усната наредба ќе важи 48 часа, а во рок од шест часа треба да биде доставена и во писмена форма. Потоа, судот ќе одлучува дали мерката ќе ја продолжи до 30 дена или ќе ја прекине.

Во пишувањето на законскиот предлог учествувале претставници на МВР и Министерството за социјална политика, демографија и млади, а следен чекор е предлог-измените да бидат доставени до Собранието, каде што ќе се најдат пред пратениците на разгледување и усвојување.

— реклама —

Министерот за внатрешни работи Панче Тошковски посочи дека искуствата од проектот „Безбеден град“ покажуваат дека за постигнување резултати не е доволна само технологијата, туку се потребни и подигнување на јавната свест и широка општествена кампања. Според него, истиот пристап треба да се примени и во борбата против семејното насилство.

— реклама —

Податоците на Министерството за социјална политика покажуваат значителен пораст на пријавите за семејно насилство во текот на оваа година. Сепак, воведувањето ново кривично дело го отежнува прецизното статистичко следење и споредување на случаите. Поголем број пријави биле забележани и во 2022 година.

Посебен раст на пријавувањето се забележува по донесувањето на законот во 2021 година, што се поврзува со поголемата охрабреност на жртвите и поактивното постапување на надлежните институции. Целта е преку координирана институционална реакција и подигнување на јавната свест да се намали и бројот на случаите што остануваат непријавени.