Напади врз сопружници, партнери и членови на семејството – 15 пријави за семејно насилство

Во изминатото деноноќие на територијата на Македонија биле регистрирани 15 пријави за семејно насилство, информира Министерството за внатрешни работи. Пријавите се однесуваат на физички напади, закани и агресивно однесување меѓу членови на семејства, партнери и поранешни партнери.

Во повеќе случаи полицијата интервенирала и лишила од слобода осомничени лица.

— реклама —

Во Охрид биле приведени двајца мажи, на возраст од 31 и 34 години, по пријави дека физички ги нападнале своите девојки. Во Гостивар бил приведен 32-годишник осомничен дека ја нападнал својата поранешна 25-годишна девојка, која е државјанка на Турција и има привремен престој во градот.

Во Пробиштип бил приведен 54-годишен маж по пријава дека ја нападнал својата 61-годишна сопруга, додека во гостиварско биле пријавени и напад врз 28-годишна сопруга, како и закани упатени од 56-годишен маж кон неговиот 31-годишен син.

— реклама —

Во струмичко, полицијата привела тројца мажи на возраст од 42, 59 и 62 години. Едниот бил пријавен за физички напад врз сопругата, вториот за агресивно однесување кон 91-годишната мајка и закани кон братот, а третиот за напад врз 53-годишната сопруга.

— реклама —

Во Велес била приведена 33-годишна жена по пријава од нејзиниот поранешен невенчан сопруг дека го нападнала. Подоцна и таа пријавила дека била физички нападната од него.

Во Куманово бил приведен 19-годишник по пријава дека физички го нападнал својот татко. Во Скопје, пак, бил извршен службен разговор со 65-годишен маж осомничен дека ја нападнал својата 62-годишна сопруга. Пријавени биле и напад врз 16-годишно момче од страна на неговиот татко, закани кон брачен пар од нивниот 18-годишен син, како и напад врз 52-годишен маж од неговата 36-годишна сопруга, која, според пријавата, се обидела да ја нападне и неговата мајка.

— реклама —

Од МВР информираат дека се преземаат мерки за целосно расчистување и документирање на сите случаи, по што ќе следуваат соодветни поднесоци.

Министерството апелира граѓаните да не го премолчуваат семејното насилство и навремено да го пријавуваат. Жртвите, но и сите што имаат сознанија за насилство врз друго лице, можат да се обратат во најблиската полициска станица или да пријават на телефонските броеви 112 и 192.