Емиратите го забрзуваат нафтениот мегапроект: нов цевковод до 2027 година

Обединетите Арапски Емирати ќе ја забрзаат изградбата на нов нафтен цевковод со цел до 2027 година да го удвојат извозниот капацитет преку пристаништето Фуџаира, соопшти денеска канцеларијата за медиуми на владата во Абу Даби.

На овој начин земјата во голема мера ќе може да ја заобиколи рутата преку Ормускиот теснец.

— реклама —

Престолонаследникот, шеик Калед бин Мохамед бин Зајед, ѝ наложил на Националната нафтена компанија во Абу Даби (ADNOC) да ја забрза реализацијата на проектот Западно-источен нафтен цевковод, се наведува во соопштението, пренесува Ројтерс.

Како што се додава, изградбата на цевководот е во тек и се очекува тој да започне со работа во 2027 година.

— реклама —

Постоечкиот нафтен цевковод во Емиратите, познат и како цевководот Хабшан–Фуџаира, може да пренесе до 1,8 милиони барели сурова нафта дневно и се покажа како клучен додека земјата се обидува да го зголеми директниот извоз од брегот на Оманскиот залив, наведува агенцијата.

— реклама —

Емиратите и Саудиска Арабија се единствените производители во регионот на Персискиот залив кои имаат нафтени цевководи преку кои нафтата се извезува надвор од Ормускиот теснец.

Техеран го наруши сообраќајот низ стратешкиот теснец меѓу Иран и Оман, како одговор на американско-израелските напади што започнаа на 28 февруари, со што е блокиран околу една петтина од глобалните испораки на нафта кои вообичаено одат кон Азија и други делови од светот.

— реклама —

Кувајт, Ирак, Катар и Бахреин речиси целосно зависат од Ормускиот теснец кога станува збор за испорака на нафта.

Цените на енергенсите значително пораснаа поради нарушувањата во испораките, што ги натера владите да воведат ограничувања на горивото и предизвика страв од економска криза и пораст на инфлацијата, наведува Ројтерс.