Повеќе од 120 лица се заразени со норовирус во Португалија, а здравствените власти се сомневаат дека епидемијата е поврзана со меѓународен младински фудбалски турнир што се одржал во градот Калдаш да Рања, во централниот дел на земјата.
Првите случаи биле регистрирани минатата недела, кога во локалната болница биле примени повеќе од 60 лица со симптоми на гастроентеритис. По лабораториските анализи, општинските власти потврдија вкупно 122 случаи на зараза.
„Сите анализирани примероци беа позитивни на норовирус од геногрупата II, со што е утврден најверојатниот причинител на епидемијата“, соопштија надлежните служби.
Според досегашната истрага, околу 80 од заразените учествувале на меѓународен младински фудбалски турнир, организиран во општините Калдаш да Рања и Обидош во периодот од 24 јуни до 8 јули.
Јавноздравствените власти, заедно со Агенцијата за безбедност на храната, извршиле проверки на компанијата што обезбедувала кетеринг за настанот. Анализирани биле примероци од храната и брисеви од работните површини, но засега не е пронајден доказ дека токму храната била извор на заразата. Истрагата продолжува.
Организаторот на турнирот соопшти дека годинашното издание било исклучително тешко поради топлотниот бран и појавата на вирусот.
Норовирусот е еден од најчестите причинители на гастроентеритис и е многу заразен. Се пренесува преку директен контакт со заразено лице, допирање контаминирани површини, како и преку загадена храна и вода, особено сурови школки и недоволно измиен зеленчук.
Здравствените власти предупредуваат дека во текот на летото ризикот од ширење на вакви вируси е поголем поради високите температури, почестото јадење надвор од домот, патувањата, камповите и масовните собири.
