Повеќе од 100 патници и членови на екипажот се заразиле со норовирус на крузерот „Карибијан принцес“, но патниците велат дека атмосферата на бродот и понатаму е речиси нормална.
Според американскиот Центар за контрола и превенција на болести, заразени се 102 од вкупно 3.116 патници, како и 13 членови на екипажот. Главните симптоми биле повраќање и дијареја.
Норовирусот е многу заразен и лесно се шири во затворени простори, како што се крузери. Ширењето на заразата било пријавено во четвртокот, за време на патувањето низ Карибите, кое трае од 28 април до 11 мај.
Компанијата „Принцес крузис“ соопшти дека веднаш биле засилени санитарните мерки и извршена дезинфекција на бродот.
„Брзо го дезинфициравме секој дел од бродот и воведовме дополнителни хигиенски мерки“, соопшти компанијата.
По пристигнувањето во Порт Канаверал на 11 мај, крузерот ќе помине низ темелно чистење и дезинфекција пред следното патување.
Патниците велат дека на бродот се забележуваат построги правила – почесто миење раце, средства за дезинфекција насекаде и укинато самостојно послужување на шведската маса.
И покрај заразата, многумина продолжуваат да учествуваат во активностите на бродот.
„Мора да се биде внимателен и да се почитуваат мерките, но атмосферата и понатаму е нормална“, изјавиле дел од патниците за американските медиуми.
Сличен случај се случил и во март, кога повеќе од 150 лица на друг брод на истата компанија исто така се заразиле со норовирус.
