Бројот на заразени со ебола во Демократска Република Конго достигна 1.203 лица, од кои 321 починале, откако новата епидемија беше прогласена во средината на мај, соопштија здравствените власти во најновиот извештај објавен во петокот.
Според податоците на Министерството за здравство, досега оздравеле 148 пациенти, додека 419 лица се наоѓаат во изолација или се лекуваат во болнички услови.
Епидемијата, предизвикана од сојот Бундибугио, зафатила 34 здравствени зони во три провинции, меѓу кои Итури, која е епицентар на кризата, како и Северен и Јужен Киву.
Здравствените власти како главни предизвици ги наведуваат отпорот на дел од населението кон тестирање по смртни случаи, недоволните капацитети за лекување во Итури, како и ниската стапка на следење на контактите на заразените.
„Владата потсетува дека борбата против еболата е одговорност на сите. Ги повикуваме граѓаните да пријават секој сомнителен случај, да ги почитуваат хигиенските мерки и да избегнуваат директен контакт со телата на починатите“, соопшти Министерството за здравство.
Директорот на Африканскиот центар за контрола и превенција на болести, Жан Касеја, изјави дека меѓународните партнери, меѓу кои и Светската здравствена организација, Европскиот центар за превенција и контрола на болести, како и француските и конгоанските власти, се целосно ангажирани во справувањето со епидемијата.
Генералниот директор на Светската здравствена организација, Тедрос Аданом Гебрејесус, предупреди дека вооружените конфликти дополнително ја отежнуваат борбата против болеста, бидејќи го ограничуваат пристапот до погодените подрачја и го зголемуваат стравот кај населението.
