Во Конго убиен медицински техничар што лекувал заболени од ебола

Во источниот дел на Демократска Република Конго група млади убила медицински техничар кој работел со заболени од ебола. Неговите колеги се засолниле во болница и се под полициска заштита откако нападот дополнително го зголемил стравот меѓу здравствените работници, пренесува „Ројтерс“.

— реклама —

Нападот се случил во петокот во градот Бафвасенде, во покраината Чопо. Убиениот техничар работел во локалната општа болница и ги едуцирал жителите за еболата и мерките за заштита од болеста. Според локален здравствен претставник, еден негов колега го преживеал нападот и закрепнува во болница.

— реклама —

Останатите здравствени работници се засолниле во општата болница, каде што добиле полициска заштита, бидејќи стравуваат да се вратат во своите домови. На подрачјето привремено била испратена и војска. „Ниту еден здравствен работник не спиеше дома бидејќи стравува за својата безбедност“, изјавил локалниот претставник.

Покраината Чопо е меѓу осумте покраини во Конго во кои брзо се шири епидемијата на ебола од сојот Бундибуџо. Според податоците на конгоанскиот Институт за јавно здравје објавени во петокот, од прогласувањето на епидемијата во мај биле потврдени 9.964 случаи на зараза, а смртноста изнесувала околу 48,6 проценти.

— реклама —

Нападите врз болниците, возилата и медицинскиот персонал ја покажуваат недовербата на дел од локалното население кон здравствените тимови. Според локалните власти, и претходно имало напади врз здравствени работници, поттикнати од лажни тврдења дека шират измислена болест.

Високиот координатор на Обединетите нации за ебола, Жилиен Харнеис, во неделата на социјалната мрежа Икс оцени дека убиството на медицинскиот техничар е загуба за борбата против еболата, но и за пациентите на кои им е потребна помош.