Американските сили денеска започнаа нови напади врз цели на Иранската револуционерна гарда во Иран, соопшти американската Централна команда (CENTCOM).
„Денеска во 12 часот по источноамериканско време, односно во 18 часот по македонско време, американските сили започнаа да напаѓаат цели на Исламската револуционерна гарда (IRGC) во Иран“, објави CENTCOM.
Од американската команда наведуваат дека нападите следуваат по неодамнешните обиди на Револуционерната гарда да нападне трговски бродови во Ормускиот Теснец, како и американски војници распоредени во регионот. Засега нема информации за обемот на најновите напади.
Нападите доаѓаат само еден ден по новата размена на директни удари меѓу САД и Иран. Американските сили претходно на иранскиот остров Ларак уништиле два ракетни лансера, за кои CENTCOM тврди дека Револуционерната гарда ги подготвувала за поставување поморски мини во Ормускиот Теснец.
Иран потоа возвратил со балистички ракети кон американски воени бази во Јордан. Иранската Револуционерна гарда соопштила дека погодила две бази и предизвикала голема штета, додека јорданската војска соопштила дека пресретнала осум ракети.
По иранскиот одговор, американскиот претседател Доналд Трамп најави нова реакција. „Ќе ги погодиме силно. Ќе има одговор“, изјавил Трамп.
Според американски информации, Трамп и неговите најблиски соработници разгледувале план за ограничени напади со цел да се спречи Иран повторно да воспостави радари, противбродски ракети и други системи што би можеле да ги загрозат танкерите, американските воени бродови и авионите во подрачјето на Ормускиот Теснец.
Ормускиот Теснец во последните месеци е едно од главните жаришта на американско-иранскиот конфликт. Американската војска изведува напади врз ирански радари, противбродски ракети и системи за надзор, а истовремено отстранува мини од главниот пловен пат за да се овозможи поголем проток на танкери.
Иран, од друга страна, продолжува со обидите за загрозување на бродовите со ракети, беспилотни летала и мини. Дополнителна загриженост предизвикале и вчерашните напади врз два танкери во близина на Ормускиот Теснец, за кои засега не е утврдено кој е одговорен.
