Естонскиот парламент ја избра правничката и канцеларка за правда Уле Мадисе за нова претседателка на државата. Во првиот круг на тајното гласање таа доби 71 од вкупно 101 пратенички глас, со што го обезбеди потребното двотретинско мнозинство.
Мадисе беше единствената кандидатка за претседателската функција. Седум гласачки ливчиња останаа празни, додека дел од пратениците не гласале или не биле присутни на седницата. За нејзиниот избор гласале 75 пратеници од владејачките Реформска партија и Еести 200, како и од опозициските социјалдемократи и конзервативната партија Исама.
Со изборот, 51-годишната Мадисе ќе биде втората жена на чело на Естонија, по Керсти Калјулаид, која беше претседателка од 2016 до 2021 година. Актуелниот претседател Алар Карис претходно најави дека нема да се кандидира за нов мандат.
Во својот говор по изборот, кој траеше нешто помалку од десет минути, Мадисе порача дека ќе работи во интерес на Естонија. Таа ја опиша земјата како една од клучните точки за безбедноста на Европа и на целиот слободен Запад, но не навлегуваше во конкретни прашања поврзани со надворешната политика.
Мадисе од 2015 година ја извршува функцијата канцеларка за правда, независна институција која ја надгледува уставноста и законитоста на прописите, како и постапувањето на државните институции и Владата. Таа е долгогодишна професорка по право на Технолошкиот универзитет во Талин и на Универзитетот во Тарту, а претходно работела и како правна советничка на поранешниот естонски претседател Тоомас Хендрик Илвес.
Претседателот на Естонија има главно протоколарни овластувања, но ја претставува државата и има значајна улога во прашањата поврзани со националната безбедност и одбраната.
