Естонија ја засилува одбраната: клучна бригада се преместува на 50 километри од Русија

Естонија ја засилува воената инфраструктура и ги поместува своите сили поблиску до границата со Русија, во рамки на новата стратегија наречена „активна одбрана“. Според „Фајненшал тајмс“, клучна естонска бригада трајно се преместува од Тапа во Јихви, град оддалечен околу 50 километри од руската граница.

Естонските власти велат дека земјата се подготвува за можен иден конфликт, иако воените и разузнавачките претставници не очекуваат Русија да започне војна со НАТО во следните две години. Истовремено, тие сметаат дека Москва се подготвува за можен иден конфликт со Естонија.

— реклама —

Како дел од новиот пристап, Естонија ги преместува своите единици поблиску до источната граница. Во Јихви се градат нови објекти за сместување на војниците, додека во пограничниот град Нарва се гради база за околу 1.000 припадници на војската.

„Мора да почнеме од границата и да победиме веќе во првите битки“, изјавил полковникот Тармо Кундла, командант на Првата естонска бригада.

— реклама —

Земјата во изминатата година склучила договори за набавка на девет американски ракетни системи HIMARS, балистички ракети М57 со дострел до 300 километри, како и девет јужнокорејски системи Chunmoo со сличен дострел. Естонија нема сопствено борбено воздухопловство.

Во мај, естонската влада концептот на „активна одбрана“ го вклучила во националната безбедносна стратегија. Промената следува по проценката на естонските воени лидери дека досегашната одбранбена доктрина, заснована на забавување на евентуалното напредување на руските сили до пристигнувањето на засилувања од НАТО, можеби нема да биде доволно ефикасна.

— реклама —

Новата стратегија предвидува борба за секој дел од територијата и можност за нанесување удари и по цели далеку зад потенцијалната линија на фронтот.

„Нашиот приоритет е јасен: непријателот и воените разурнувања да ги држиме подалеку од естонската територија“, порача Министерството за одбрана на Естонија.

— реклама —

Естонската воена разузнавачка служба особено ја следи можноста за ограничени дејства во пограничните области, вклучително и во Нарва, каде што значителен дел од населението има руски како мајчин јазик. Според проценките на естонските власти, таков развој би можел да биде искористен како тест за одлучноста на НАТО и да создаде поделби во Алијансата.