Европската Унија, по повеќе од 13 години преговори, ја усвои реформата на правилата за правата на патниците во воздушниот сообраќај. Новите прописи, кои се очекува да почнат да важат од средината на 2027 година, носат повеќе нови права за патниците, но и појасни обврски за авиокомпаниите.
Една од најважните одредби останува непроменета – патниците и понатаму ќе имаат право на паричен надомест доколку нивниот лет доцни најмалку три часа, иако првично беше предложено границата да се зголеми на четири часа.
Висината на надоместокот ќе остане од 250 до 600 евра, во зависност од должината на летот. Истите правила ќе важат и за откажани летови, доколку патникот бил известен за откажувањето помалку од 14 дена пред планираното полетување.
Новите правила прецизно ги утврдуваат и таканаречените вонредни околности во кои авиокомпаниите нема да бидат одговорни за исплата на надомест, како што се екстремни временски услови, природни катастрофи, штрајкови на аеродромите или несоодветно однесување на патниците. Сепак, превозникот ќе мора да докаже дека токму тие околности го предизвикале нарушувањето на летот.
Авиокомпаниите ќе бидат обврзани во рок од 96 часа по завршувањето на патувањето да ги информираат патниците за нивните права. Потоа, патниците ќе имаат девет месеци да поднесат барање за обесштетување, а компанијата ќе мора во рок од 30 дена да го исплати надоместот или писмено да објасни зошто барањето е одбиено.
Меѓу најзначајните новини е тоа што децата помлади од 14 години ќе можат бесплатно да седат до своите родители, без дополнителен надомест за избор на седиште. Истото право ќе го имаат и бремените жени, како и лицата со намалена подвижност и нивните придружници.
Авиокомпаниите ќе мора бесплатно да ги исправат правописните грешки во имињата на билетите, како и без надомест да издадат карта за качување за патниците кои веќе се пријавиле за лет.
Дополнително, цените на билетите задолжително ќе мора да бидат прикажани заедно со рачниот багаж, со цел полесно споредување на понудите. Сепак, превозниците и понатаму ќе можат да нудат поевтини билети за патници кои доброволно ќе се откажат од внесување поголем ранец во кабината.
Во случај патник да биде префрлен во пониска класа од онаа што ја резервирал, авиокомпанијата автоматски ќе треба да му врати дел од уплатените средства во рок од 14 дена.
Новите правила предвидуваат и појасни права при доцнење на летовите. По две часа чекање патниците ќе имаат право на освежување, по три часа на оброк, а потоа и на дополнителен оброк на секои пет часа. Освен тоа, ќе имаат право на пристап до интернет и најмалку два телефонски повици.
Доколку е потребно ноќевање поради нарушување на патувањето, авиокомпанијата ќе мора бесплатно да обезбеди хотелско сместување и превоз до хотелот и назад. Ако тоа не го направи, патниците ќе можат сами да организираат сместување и подоцна да бараат надомест на трошоците.
Реформата ќе важи за сите летови што полетуваат од земјите на Европската Унија, без разлика на тоа која авиокомпанија ги извршува. За летовите што полетуваат надвор од ЕУ, а слетуваат во Унијата, правилата ќе се применуваат само доколку превозникот е регистриран во ЕУ. Се очекува новите права да почнат да се применуваат од средината на 2027 година.
