Европската Унија е чекор поблиску до воведување на сопствена дигитална валута, откако Комитетот за економска и монетарна политика на Европскиот парламент даде поддршка за проектот за дигитално евро. Според предвидувањата, новата валута би можела да биде достапна до 2029 година.
Со овој проект, Европската Унија има за цел да ја намали зависноста од американските платежни системи и да ја зајакне својата финансиска автономија.
Податоците на Европската централна банка покажуваат дека компаниите „Виза“ и „Мастеркард“ учествуваат со 61 отсто во сите картични плаќања во еврозоната и речиси целосно доминираат во прекуграничните трансакции.
Дигиталното евро ќе претставува електронска форма на пари издадена и гарантирана од Европската централна банка. Тоа нема да ја замени готовината, туку ќе функционира како дополнителен начин на плаќање покрај банкнотите, монетите и постојните банкарски услуги.
Според предлогот, граѓаните ќе можат да чуваат дигитални евра во посебен дигитален паричник, при што ќе постои ограничување на максималниот износ што ќе може да се поседува. Системот ќе овозможува и онлајн и офлајн плаќања, а ЕЦБ нема директно да може да ги идентификува корисниците врз основа на нивните трансакции.
Основната инфраструктура ќе ја обезбедува Европската централна банка, додека комерцијалните банки и давателите на платежни услуги ќе ги нудат услугите на граѓаните и компаниите.
Европската централна банка ја поздрави одлуката на комитетот, оценувајќи дека новата регулатива ќе ја заштити готовината како законско средство за плаќање, а истовремено ќе го обликува идниот систем на дигиталното евро.
Следниот чекор е Европскиот парламент формално да го потврди ставот на комитетот на пленарна седница во Стразбур, која се очекува на почетокот на јули. Потоа ќе започнат преговорите со 27-те земји членки на Европската Унија.
Доколку процесот се одвива според предвидениот план, конечен договор би можел да биде постигнат до крајот на годината, а дигиталното евро да стане реалност до 2029 година.
Покрај Европската Унија, и други светски сили работат на развој на сопствени дигитални валути. Кина веќе го тестира дигиталниот јуан, додека Русија најави дека дигиталната рубља ќе биде пуштена во употреба во текот на оваа година.
