ЕУ го продолжи ограничувањето на цената на руската нафта

Амбасадорите на земјите-членки на Европската Унија денеска се договорија ограничувањето на максималната цена на руската нафта да остане на сила до 23 јули, додека продолжуваат преговорите за преостанатите отворени прашања од 21. пакет санкции против Русија.

— реклама —

Земјите-членки веќе неколку дена се обидуваат да постигнат договор за новите санкции, кои, меѓу другото, предвидуваат задржување на горната граница на цената на руската нафта на 44,10 долари за барел.

— реклама —

Ограничувањето им забранува на европските компании да обезбедуваат услуги, како што е осигурување, за танкери што превезуваат руска сурова нафта продадена по цена повисока од утврдениот лимит.

— реклама —

Според дипломатски извори, доколку не беше донесена денешната одлука, руската нафта би можела да се продава по актуелните пазарни цени, кои би можеле дополнително да пораснат поради обновените тензии на Блискиот Исток, со што Русија би остварила поголеми приходи.

— реклама —

Едно од прашањата за кои сè уште нема согласност е барањето на Грција да се дозволи транспорт на руски течен природен гас кон трети земји.