Европската Унија и Украина потпишаа договор за заедничко поттикнување на производството на беспилотни летала, со цел да се спојат индустриските капацитети на ЕУ со борбеното искуство што Украина го стекна за време на повеќегодишната војна со Русија.
Договорот во Киев го претставија претседателката на Европската комисија, Урсула фон дер Лајен, и украинскиот претседател Володимир Зеленски.
Зеленски истакна дека Украина во моментов произведува околу 10 милиони дронови годишно, а целта е тоа производство да се удвои.
„Украина за првпат суштински го промени начинот на водење на војната“, изјави тој, нагласувајќи ја важноста на беспилотните летала во одбраната од руската агресија.
Средствата за проектот ќе бидат обезбедени од два европски фонда – заемот за поддршка на Украина во вредност од 90 милијарди евра и одбранбената програма SAFE, во која преостанати се околу 10 милијарди евра.
Фон дер Лајен оцени дека Европа располага со силни технолошки и индустриски капацитети, но дека украинското борбено искуство е клучно за понатамошен развој на оваа технологија.
„Европа има производствени капацитети, а Украина има знаење стекнато на бојното поле. Заедно можеме да создадеме многу повеќе“, рече претседателката на Европската комисија.
Договорот предвидува дел од производството и складирањето на дроновите да се одвива во земјите членки на Европската Унија, со цел да бидат заштитени од можни руски напади. По краткотрајно складирање, тие ќе бидат испорачувани во Украина или во земји членки кои сакаат да ги зајакнат своите одбранбени капацитети.
Европската комисија најави дека во иднина планира соработката со Украина да ја прошири и на заедничко производство на балистички и противбалистички ракетни системи.
