Европската комисија соопшти дека технолошката компанија „Мета“ ги прекршила правилата на Европската унија бидејќи не успеала ефикасно да спречи деца помлади од 13 години да користат профили на Фејсбук и Инстаграм. Станува збор за прелиминарни наоди од истрага што траела речиси две години, во рамки на европските напори за посилна заштита на малолетниците на интернет.
Според Комисијата, компанијата немала доволно делотворни механизми за проверка на возраста, ниту доволно сигурни пречки што би го оневозможиле отворањето сметки од страна на помлади корисници. Во исто време, и самите внатрешни правила на „Мета“ ја наведуваат минималната возраст од 13 години за користење на услугите.
Европската комисија оценува дека „Мета“ може да сноси одговорност за прекршување на Законот на ЕУ за дигитални услуги (DSA), кој од големите платформи бара да ги препознаваат и да ги намалуваат ризиците за децата во онлајн средината. Доколку прелиминарните наоди се потврдат, компанијата би можела да се соочи со парична казна до 6% од годишниот глобален приход.
Од „Мета“ ги отфрлија прелиминарните заклучоци и наведоа дека веќе користат системи за откривање и отстранување сметки на корисници помлади од 13 години, додавајќи дека проверката на возраста е „предизвик за целата индустрија“.
Истрагата се одвива во време кога повеќе европски земји најавуваат или разгледуваат построги ограничувања за користење социјални мрежи кај деца, со предлози што одат и кон подигнување на возрасниот праг на 15 или 16 години. Комисијата, според најавите, продолжува со постапката, вклучително и со процена на можните штетни влијанија од алгоритмите врз менталното здравје на младите корисници.
