ЕУ му изрече казна од 890 милиони евра на Гугл

Европската комисија му изрече казни во вкупен износ од 890 милиони евра на американскиот технолошки гигант „Гугл“ поради прекршување на правилата за конкуренција предвидени со Законот за дигитални пазари (DMA).

Од Комисијата соопштија дека компанијата незаконски ги фаворизирала сопствените услуги во резултатите од пребарувањето, а истовремено им наметнувала ограничувања на развивачите на апликации за „Андроид“ во комуникацијата со нивните корисници.

— реклама —

Првата казна, во износ од 460 милиони евра, се однесува на фаворизирањето на услугите на „Гугл“ во области како што се онлајн купување, хотели, транспорт и спортски резултати. Според европските правила, големите дигитални платформи не смеат да им даваат предност на сопствените услуги во однос на конкурентските.

— реклама —

Еврокомесарката за конкуренција Тереза Рибера изјави дека најдобрите производи треба да успеваат поради нивниот квалитет, а не затоа што припаѓаат на компанијата што управува со интернет-пребарувачот.

Втората казна, во висина од 430 милиони евра, е изречена затоа што „Гугл“ не им дозволувал на развивачите на апликации да ги информираат корисниците за бесплатни или поевтини понуди надвор од продавницата „Гугл Плеј“.

— реклама —

Со вкупниот износ од 890 милиони евра, ова е најголемата парична казна досега изречена според европскиот Закон за дигитални пазари. Претходно, Европската комисија ги казни „Мета“ со 200 милиони евра и „Епл“ со 500 милиони евра.

Од „Гугл“ ја оценија одлуката како неправедна. Одговорниот за меѓународното работење на компанијата, Кент Вокер, изјави дека спроведувањето на барањата на Европската комисија би довело до отстранување на одредени функции за пребарување во реално време и до слабеење на безбедносните механизми во „Гугл Плеј“.

Европската комисија соопшти дека компанијата има рок од 60 дена да се усогласи со правилата, а во спротивно може да се соочи со дополнителни санкции. Постапката против „Гугл“ беше отворена во март 2024 година.