ЕУ планира воведување данок за компаниите кои профитираат од војната со Иран

Пет министри за финансии од Европската унија повикаа на воведување данок на неочекуваната добивка на енергетските компании како реакција на растечките цени на горивата поради војната со Иран, се наведува во писмо од министрите упатено до Европската комисија, кое денес го доби на увид агенцијата Ројтерс.

Министрите за финансии на Германија, Италија, Шпанија, Португалија и Австрија испратија заеднички повик во писмо од петокот, наведувајќи дека таквата мерка би била сигнал дека „стоиме единствени и дека сме способни да преземеме мерки“.

— реклама —

„Тоа исто така би испратило јасна порака дека оние кои профитираат од последиците на војната треба да дадат свој придонес за олеснување на товарот врз пошироката јавност“, напишаа министрите.

— реклама —

Цените на нафта и гас нагло пораснаа од почетокот на американско-израелските напади врз Иран на 28 февруари, создавајќи ценовен шок сличен на енергетската криза низ која помина Европа по нападот на Русија врз Украина во 2022 година, иако земјите од ЕУ сега добиваат повеќе енергија од обновливи извори.

Во писмото упатено до комесарот на ЕУ за клима, Вопке Хукстри, министрите укажаа на сличен вонреден данок од 2022 година како решение за високите трошоци за енергија.

— реклама —

„Со оглед на актуелните пазарни дисторзии и фискалните ограничувања, Европската комисија треба брзо да развие сличен инструмент на придонес на ниво на ЕУ заснован на цврста правна основа“, напишаа министрите.

Во писмото не се наведени детали за тоа која ниво на данок на неочекуваната добивка се предлага, ниту за кои компании би се однесувал.

Комесарот на блокот за енергетика изјави во вторникот дека се разгледува повторно воведување на мерките за енергетска криза користени во 2022 година, вклучително предлози за ограничување на мрежните тарифи и данокот на електрична енергија.