ЕУ повторно размислува за укинување на забраната за шест американски сорти грозје

Европската Унија повторно ја разгледува можноста за укинување на повеќедецениската забрана за комерцијално производство на вино од шест американски сорти грозје – ноа, отело, изабела, жакез, клинтон и хербемон, кои пристигнале во Европа од Северна Америка во 19 век.

— реклама —

Иницијативата ја покрена францускиот европратеник Ерик Сарџакомо, кој смета дека ограничувањата се застарени. Тој посочува дека е нелогично вината од овие сорти да можат да се увезуваат и консумираат во Европа, додека нивното производство на европска територија останува забрането.

Поддржувачите на иницијативата сметаат дека современите производители располагаат со технологија и знаење за да произведат квалитетно вино и дека конечната одлука треба да им се препушти на потрошувачите и пазарот. Според стручњаците, проблемот можеби не е во самите сорти, туку во методите на производство што се применувале во минатото.

— реклама —

Сепак, дел од винската индустрија се противи на укинувањето на забраната. Критичарите предупредуваат дека овие сорти можат да дадат високи приноси и дополнително да го оптоварат европскиот пазар. Како недостаток се наведува и специфичниот мошусен вкус на вината произведени од нив.

— реклама —

Франција, Италија и Шпанија и претходно се спротивставиле на сличен предлог на Европската комисија во 2019 година, оценувајќи дека легализацијата може да ги наруши угледот и препознатливоста на европските вина.

Иако Европскиот парламент претходно годинава поддржал измени за легализација на овие сорти, предлогот не поминал во преговорите со Советот на ЕУ поради противењето на земјите со развиено винско производство. Сарџакомо сега се обидува измените да ги вклучи во новата регулатива за земјоделските пазари, која треба да се применува по 2027 година.

— реклама —

Забраната во Франција била воведена во 1930-тите години, во период на голема криза во винската индустрија, предизвикана од прекумерното производство и падот на цените. Тогашните власти тврделе дека овие сорти го загрозуваат квалитетот и меѓународниот углед на француските вина.