Европската Унија од 1 јули ја воведе привремената царина од три евра за пакети со вредност до 150 евра кои пристигнуваат од земји надвор од Унијата, а најголем дел од нив се нарачани преку онлајн продавници.
Новата мерка се однесува на производи како облека, играчки, електронски уреди и други стоки за широка потрошувачка кои најчесто се купуваат преку интернет.
Од Европската комисија наведуваат дека секојдневно на европскиот пазар пристигнуваат милиони пакети со ниска вредност, при што дел од производите не ги исполнуваат безбедносните стандарди на ЕУ или се потценети и лажно декларирани за да се избегнат царински давачки.
Според Комисијата, досегашното ослободување од царина им овозможувало неправедна предност на продавачите од земји надвор од Европската Унија во однос на компаниите што работат на европскиот пазар.
Царината се пресметува според тарифната класификација на производите, а не според нивниот број. Така, доколку во пакетот има пет маици, ќе се наплати една царина од три евра бидејќи станува збор за иста тарифна категорија. Но, ако пакетот содржи три маици и часовник, ќе се наплатат шест евра, бидејќи производите припаѓаат на две различни тарифни категории.
Обврската за пријавување и плаќање на царината ја има продавачот или увозникот, како дел од царинската постапка.
Со оваа мерка Европската Унија има цел да обезбеди пофер конкуренција за европските компании, подобра заштита на потрошувачите од небезбедни производи, поефикасна борба против царинските измами и намалување на влијанието на масовниот транспорт врз животната средина.
Паралелно со воведувањето на новата давачка, ЕУ продолжува со модернизација на царинските процедури со цел зајакнување на единствениот европски пазар и обезбедување еднакви услови за сите компании што продаваат стоки во Унијата.
