Градоначалникот на Битола, Тони Коњановски, денеска оствари средба со новиот тренер на РК Еурофарм Пелистер, Лино Червар, кој официјално ќе биде претставен како предводник на битолскиот ракометен клуб.
Червар потпиша тригодишен договор и по петгодишна пауза повторно се враќа на тренерската работа.
„Му посакав добредојде и многу спортски успеси нему и на ракометарите на клубот“, објави Коњановски.
Станува збор за еден од најтрофејните ракометни стратези во историјата. Седумдесет и петгодишниот Червар, роден во Умаг, Хрватска, во својата богата кариера беше олимписки и светски шампион со хрватската репрезентација, а ја предводеше и македонската репрезентација.
Зад себе остави значаен белег и во РК Металург, каде што беше препознатлив по работата со млади ракометари и создавањето нови репрезентативци. Меѓу играчите чиј развој се поврзува со него се и Филип Кузмановски, Мартин Талевски и Мартин Дрогришки.
На средбата со Коњановски присуствувале и претседателот на клубот Зоран Стерјев, потпретседателот Бојан Стерјев и спортскиот новинар Зоран Мишевски.
