Червар официјално во Пелистер: Се вратив во мојата втора татковина, во Битола ќе ја завршам мојата тренерска кариера
Со порака дека Битола е град каде ракометот се живее и доживува како религија, новиот тренер на Еурофарм Пелистер, Лино Червар, денеска и официјално го започна своето ново поглавје во македонскиот ракомет.Искусниот хрватски стратег, кој потпиша тригодишен договор со битолскиот клуб, истакна дека враќањето во Македонија по осум години за него претставува посебна чест и откри дека токму во Битола планира да ја заврши својата богата тренерска кариера.Червар најави напорна работа и голема борба во домашниот шампионат, притоа нагласувајќи ја важноста на соработката и ривалството меѓу македонските клубови.Чест ми е да работам во Битола. Ова е град со огромна ракометна традиција. По осум години се враќам во мојата втора татковина и тука ќе биде крај на мојата кариера, а тоа е најубаво во градот каде ракометот е религија. Да го работиш она кое го сакаш е најголемата среќа на човекот. Видов дека постои желба кај луѓето од Битола да дојдам и го прифатив тоа. Ќе имам тешка задача, конкуренцијата е голема, ама мораме да одиме позитивно. Мора да ги пофалиме конкурентите, Вардар кој се разбуди и оди со крупни чекори, потоа и Охрид кој освои европска титула, мора да бидеме пријатели и да соработуваме, ама да има и борба. Македонија е мала земја, мора сите да бидеме едни за други, изјави Червар.
Спорт | пред 5 часа
