Повеќе од 44.000 луѓе се евакуирани од неколку градови во јужна Калиорнија поради опасност од можна експлозија на резервоар со токсична хемикалија во воздухопловен погон во округот Оринџ.
Локалните власти предупредија дека оштетениот резервоар би можел да откаже во секој момент и потенцијално да експлодира.
Шефот на противпожарната служба на округот Оринџ, Крег Кови, изјави дека во индустрискиот резервоар во погонот се наоѓаат околу 26.500 литри метил-метакрилат – многу испарлива и лесно запалива токсична супстанција што се користи во производството на пластика.
„Резервоарот ќе откаже, само не знаеме кога“, изјави Кови на прес-конференција, додавајќи дека ова е една од најопасните ситуации со кои се соочил во својата 32-годишна кариера.
Според властите, во постројката има три резервоари, а кај еден од нив дошло до дефект на системот за ладење.
Постојат две можни сценарија – резервоарот да протече и да ослободи илјадници литри опасни хемикалии, или да дојде до неконтролирано загревање и експлозија што би можела да ги зафати и околните резервоари со гориво и хемикалии.
Засега нема активно истекување ниту опасни честички во воздухот, бидејќи резервоарот е доволно разладен. Сепак, експертите предупредуваат дека метил-метакрилатот може да предизвика иритација на дишните патишта, кожата и очите, како и мачнина и вртоглавица.
Противпожарните екипи интервенирале во воздухопловниот погон на компанијата GKN Aerospace во градот Garden Grove по пријава за инцидент со опасни материи.
Причината за дефектот сè уште се истражува, а засега нема пријавени повредени лица.
