Амбасадорите на земјите-членки на Европската Унија постигнаа договор за 21. пакет санкции против Русија, со што се отвора патот за негово формално усвојување по завршувањето на писмената процедура, потврдуваат дипломатски извори.
Преговорите за новите санкции траеја неколку дена, а последната пречка беше барањето на Грција нејзините бродски компании да продолжат да превезуваат руски течен природен гас наменет за трети земји. Постигнатиот компромис предвидува ограничено изземање од забраната за договори склучени пред 24 февруари 2022 година, односно пред почетокот на руската инвазија врз Украина. Советот на ЕУ ќе го преиспитува ова изземање еднаш годишно.
Пакетот предвидува и замрзнување на максималната цена на руската нафта на сегашното ниво од 44,10 американски долари за барел во период од 12 месеци. Според ЕУ, со оваа мерка дополнително ќе се ограничат приходите на Русија од извозот на нафта.
Во новиот пакет санкции се опфатени досега најголем број физички и правни лица. Предвидени се нови ограничувања за рускиот финансиски сектор, дополнителни мерки против платформите за тргување со криптовалути, како и нови трговски ограничувања насочени кон руската воена индустрија. На листата се додадени и нови бродови поврзани со таканаречената руска „флота во сенка“.
Претседателката на Европската комисија, Урсула фон дер Лајен, го поздрави договорот, оценувајќи дека санкциите продолжуваат да ги ослабуваат економските основи на руските воени активности.
Таа соопшти дека во рамките на новиот пакет е направен и значаен чекор кон формална забрана за влез на руски борци во Европската Унија. Дополнително, на листата за забрана на трансакции се додадени уште 32 руски банки, како и платформи за тргување со криптовалути и нафта. Фон дер Лајен нагласи дека за првпат санкциите се насочени и кон пловила кои, според ЕУ, ѝ помагаат на руската „флота во сенка“.
