Очите на македонската и бугарската јавност денеска се вперени кон Стразбур, каде што Европскиот парламент треба да се изјасни за извештајот за напредокот на Македонија на патот кон Европската Унија, изготвен од известувачот Томас Вајц.
Во центарот на вниманието е амандманот со кој се предлага бришење на ставот 73 од извештајот, во кој се споменува Вториот протокол од Договорот за добрососедство меѓу Македонија и Бугарија.
Доколку европратениците го поддржат предлогот на Вајц, во конечниот текст на извештајот повеќе нема експлицитно да се наведува Вториот протокол, што предизвика остри реакции во Софија.
Бугарските претставници оценија дека ваквиот потег претставува обид за релативизирање на обврските што произлегуваат од билатералните договори и од преговарачката рамка на Европската Унија.
Во пресрет на денешното гласање, бугарската страна повторно ги актуализираше обвинувањата за наводни инциденти и напади врз лица и имот поврзани со Бугари во Македонија, посочувајќи ги и неодамнешните случаи на опожарени возила.
Иако извештаите на Европскиот парламент немаат обврзувачка сила, тие се сметаат за важен политички показател за оценките на европските институции за напредокот на земјите кандидати и за прашањата што влијаат врз нивниот евроинтегративен процес.
Поради тоа, исходот од денешното гласање внимателно се следи и во Скопје и во Софија, бидејќи може да испрати значајна политичка порака во пресрет на следните чекори на Македонија на патот кон членство во Европската Унија.
