Европскиот парламент го критикуваше Зеленски поради одлуката за воената единица

Европскиот парламент со големо мнозинство усвои амандман на извештајот за Украина, во кој го критикува украинскиот претседател Володимир Зеленски поради одлуката една елитна воена единица да се преименува по Украинската востаничка армија (УПА).

— реклама —

Одлуката предизвика нови тензии меѓу Киев и Варшава, откако Зеленски на 26 мај на воената единица ѝ го додели името „Херои на Украинската востаничка армија“.

— реклама —

УПА во текот и по Втората светска војна водеше борба за независност на Украина од Советскиот Сојуз, но во Полска нејзиното наследство останува крајно контроверзно поради улогата на дел од нејзините припадници во масовните убиства на десетици илјади етнички Полјаци.

Во амандманот, поднесен од полскиот европратеник Анджеј Халицки, се наведува дека Европскиот парламент „жали поради неодамнешната непотребна и неиспровоцирана ескалација“ од страна на Зеленски со преименувањето на елитната единица по УПА.

— реклама —

Во текстот се додава дека Европскиот парламент жали што не биле земени предвид чувствата и болката на Полска, особено имајќи ја предвид силната поддршка што Варшава ѝ ја дава на Украина во одбраната од руската агресија.

— реклама —

Амандманот беше усвоен со 592 гласа „за“ и 42 „против“.