Американските безбедносни служби спречиле сериозен безбедносен инцидент откако ФБИ разоткрило и осуетило план за координиран терористички напад врз настанот „Слобода 250“ на UFC, кој викендов се одржа во Белата куќа. Пет лица се уапсени и се наоѓаат во притвор.
Според судските документи објавени од американските медиуми, осомничените планирале да извршат напад со снајперисти и мали дронови опремени со експлозивни направи. Нивна главна цел биле високи државни функционери и влијателни гости кои присуствувале на настанот организиран на Јужниот тревник на Белата куќа, каде што во првите редови бил и американскиот претседател Доналд Трамп.
Истражителите наведуваат дека групата била мотивирана од антивладини ставови, незадоволство од американската поддршка за Израел, како и од начинот на кој властите постапувале со документите поврзани со случајот на Џефри Епштајн. Осомничените комуницирале преку социјалните мрежи и апликацијата „Сигнал“, каде што разработувале детали за логистиката, евакуацијата и извршувањето на нападот.
Истрагата започнала по дојава од мајката на еден од осомничените, која пријавила дека нејзиниот 19-годишен син набавувал балистичка опрема и оружје со средства добиени по завршувањето на средното образование. При претресите биле пронајдени илјадници парчиња муниција и тактичка опрема, додека не биле откриени дронови, што според истражителите укажува дека тој дел од планот сè уште бил во фаза на подготовка.
Директорот на ФБИ, Кеш Пател, ја пофали координираната акција на федералните и локалните служби, нагласувајќи дека заканата била навреме неутрализирана.
„Благодарение на брзата реакција на ФБИ, нашите партнери и Министерството за правда, повеќе лица се во притвор, а планираните напади се целосно спречени“, наведе Пател.
Заменик-директорот на Тајната служба, Мет Квин, изјави дека истрагата продолжува бидејќи постои можност во случајот да се вмешани и други лица.
„Ова беше сериозна закана. Продолжуваме да работиме сè додека не бидат идентификувани сите инволвирани. Самиот настан никогаш не бил доведен во опасност благодарение на навремената истражна работа“, истакна Квин.
Меѓу потенцијалните цели на заговорот, според истражните документи, била и сенаторката Марша Блекбурн, која по објавувањето на информациите им се заблагодари на безбедносните служби за нивната работа.
Надлежните органи потврдија дека против сите петмина приведени се поднесени обвиненија поврзани со заговор за убиство, а истрагата продолжува во координација со федералните и правосудните институции.
