Фехми Стафа бара порано да излезе од затвор, Пецов ја платил казната од 8.000 евра пред правосилноста на пресудата

Поранешниот државен правобранител и адвокат Фехми Стафа побарал порано да излезе од затвор, откако ја обжалил одлуката на Основниот кривичен суд Скопје, со која му е одобрен условен отпуст од еден месец.

Стафа е осуден на една година и три месеци затвор за примање мито, а според одлуката на првостепениот суд, наместо на 13 март 2027 година, од затвор би требало да излезе на 1 февруари.

Претседателката на Кривичниот суд, Даниела Димовска, денеска информираше дека Стафа ја обжалил одлуката и дека предметот на 24 септември бил испратен до Апелацискиот суд.

— реклама —

„Оваа одлука е обжалена од страна на осудениот и предметот е пратен во Апелација на 24 септември 2026 година“, соопшти Димовска, појаснувајќи дека Стафа во моментов не е пуштен на условен отпуст.

Стафа беше уапсен на 13 декември, откако полицијата го фати „ин флагранти“ со 50.000 евра од вкупно 100.000 евра, колку што побарал од својот клиент Љупчо Пецов, познат како Ѓаволот, за да влијае врз судија од Апелацискиот суд во Скопје, за да му биде укината мерката притвор.

Неколку месеци подоцна, Стафа призна вина и се спогоди со Основното јавно обвинителство за гонење организиран криминал и корупција, по што беше осуден на затворска казна.

— реклама —

Димовска денеска информираше и дека Љупчо Пецов ја платил паричната казна од 8.000 евра, што му била изречена покрај условната казна од две години затвор.

Пецов ја платил казната на 2 септември, уште пред пресудата да стане правосилна. Пресудата станала правосилна на 21 септември, откако ниту една од странките не вложила жалба.

Пецов за случајот „Синџир“ признал вина на 24 август. Покрај условната казна од две години, која нема да се изврши доколку во наредните пет години не стори ново кривично дело, нему му е изречена и парична казна од 8.000 евра, како и забрана да основа и да управува со фирма во период од 10 години.

Парична казна е изречена и за фирмата поврзана со Пецов, која е во стечај.

— реклама —

Пецов беше еден од обвинетите во случајот „Синџир“, отворен кон крајот на октомври 2023 година. Во истрагата беа опфатени 26 лица, сопственици и управители на 28 фирми, кои беа осомничени, а потоа и обвинети за создавање шема за даночно затајување.

Според истрагата, преку издавање фактури со ДДВ за наводно извршени набавки, кои не постоеле, бил оштетен државниот буџет за околу осум милиони евра.

Пецов по отворањето на случајот ја напушти државата, но кон крајот на декември минатата година се врати и им се предаде на надлежните органи. Неговото предавање уследи неколку дена по апсењето на неговиот адвокат Фехми Стафа.

Во јануари годинава, во акција на ОЈО ГОКК и МВР беше уапсен и апелацискиот судија Ѓоко Ристов. Во неговиот семеен дом во Неготино, зад плочките во кујната, биле пронајдени заѕидани 350.000 евра.

Од ОЈО ГОКК тогаш соопштија дека информациите поврзани со истрагата за Ристов почнале да добиваат смисла со апсењето на Стафа, но истрагата не потврдила дека парите што ги барал Стафа требало да завршат кај судијата.

Против Ристов во тек е судски процес за прикривање имот и перење пари.