Стафа сведочеше за случајот со заѕиданите 350 илјади евра: Негираше дека му дал пари на судијата Ѓоко Ристов, 20 илјади евра биле адвокатска награда, а 30 илјади заем од Ѓаволот

Фехми Стафа, поранешен државен правобранител кој моментално издржува затворска казна, денеска беше спроведен од затворот „Шутка“ во Кривичниот суд, каде што сведочеше во постапката против судијата Ѓоко Ристов. Стафа беше предложен како сведок на одбраната.

Иако во сопствениот предмет претходно признал вина и се спогодил со обвинителството, Стафа пред судот денеска негираше дека парите што ги зел од сестрата на Љупчо Пецов – Ѓаволот, биле наменети за Ристов.

Според обвинението, Стафа како адвокат побарал и зел вкупно 50 илјади евра со цел да му ги даде на судијата. Тој, пак, пред судот тврдеше дека 20 илјади евра биле адвокатска награда за застапувањето на Пецов, додека преостанатите 30 илјади евра, според неговиот исказ, Пецов му ги дал како заем.

„Во ниту еден предмет не сум му дал пари на Ѓоко Ристов“, рече Стафа.

Тој објасни дека признанието на вината било резултат на неговата проценка дека тоа е помалото зло. Според Стафа, додека бил во притвор, бил убеден дека нема да излезе жив од затворската ќелија.

— реклама —

„Кога видов дека нема друго, решив да признаам. Бев убеден дека нема да излезам жив од таа ќелија“, рече тој.

Во сведочењето, Стафа се осврна и на своите тврдења за наводни притисоци од истражители и обвинителката Искра Хаџи-Василева. Тој рече дека бил притискан да прифати дека 20 илјади евра требало да му бидат дадени на Ристов.

Според неговото сведочење, истражител му се повикувал на обвинителката и му велел дека доколку сака да се „спаси“, треба да ја прифати таа верзија.

„Десет години ќе лежам, нема тоа да го дозволам“, рече Стафа, раскажувајќи го својот наводен одговор.

Тој изнесе и тврдења за постапувањето на истражителите при неговото лишување од слобода.

— реклама —

„Беше многу агресивен, ми вршеше тортура, ме малтретираше и физички сакаше да ме нападне“, сведочеше Стафа.

Според него, при претресот не биле пронајдени 20 илјади евра, иако, како што тврдеше, парите биле пријавени. Тој посочи и дека во официјалните записи не бил евидентиран целиот период од неговото лишување од слобода и рече дека поради тоа поднел претставка до Внатрешна контрола.

Стафа пред судот го спомена и обвинителот Артан Ајро, за кого рече дека во ОЈО за гонење на организиран криминал и корупција „застанал пред него и му се смеел во очи“. Наведе дека за своите тврдења поднел претставки до Внатрешна контрола, Советот на јавни обвинители и други институции.

Во неговото сведочење беше спомената и обвинителката Наташа Поп-Трајкова, која, според Стафа, по неговото апсење предложила притворот за Пецов да биде укинат и заменет со куќен притвор.

— реклама —

Како аргумент дека немал можност да влијае врз одлуките за притворот на Пецов, Стафа го посочи фактот дека 11 дена пред неговото апсење, Апелациониот суд веќе одлучил по жалбата за притворот и ја одбил жалбата Пецов да биде пуштен.

„Ви тврдам дека апсолутно Ѓоко најмалку е виновен за овој предмет. Нема допирна точка со овој предмет. Да е вистина, тој ќе го укинуваше притворот“, рече Стафа.

Во вкрстеното испитување биле разгледувани и снимките од камерите на кои, според обвинителството, Стафа доаѓал во Апелациониот суд и одел во канцеларијата на Ристов. Тој одговорил дека кај Ристов одел многу поретко отколку кај други судии и дека во Апелација одел и за консултации за правни прашања.

Стафа ги негираше и наводите дека парите што ги побарал од Пецов и неговата сестра биле наменети за судијата. Според него, станувало збор за адвокатски услуги, а наводите дека парите требало да завршат кај Ристов биле конструкција на истрагата.

Во текот на сведочењето било отворено и прашањето за 100 илјади евра што се споменуваат во доказниот материјал и комуникациите поврзани со предметот. Стафа повторно рекол дека се работело за адвокатски услуги и негирал дека средствата биле наменети за влијание врз судија.

— реклама —

Обвинителката во вкрстеното испитување го потсетила дека Стафа претходно се согласил на спогодба со обвинителството и ја признал вината. Тој останал на ставот дека признанието било свесна одлука, но не и потврда дека сите наводи од пресудата се точни.

„Од две зла го избрав поблагото“, рече Стафа, но пред судот потврдил дека Љупчо Пецов и неговата сестра во обвинителството кажале дека парите биле за Ристов.

Стафа во сведочењето зборуваше и за своето семејство и за здравствената состојба на своето дете, за кое наведе дека има церебрална парализа. Тој рече дека додека бил во притвор повеќепати барал мерката да му биде заменета со куќен притвор.

Освен Стафа, одбраната на Ристов ги предложила како сведоци и неговите родители, кај кои, според наводите во предметот, биле пронајдени заѕидани 350 илјади евра, како и Љупчо Пецов – Ѓаволот.

Адвокатот на Ристов, Звонко Давидовиќ, потврдил дека Пецов е предложен како сведок, но рекол дека не е сигурен дали тој ќе се појави пред судот.