Компанијата Мета најави воведување на неколку нови платени претплати за своите платформи Фејсбук, Инстаграм и Вотсап, како и тестирање на премиум пакети за вештачката интелигенција Мета АИ.
Директорката за производи во Мета, Наоми Глајт, соопшти дека новите пакети „Facebook Plus“, „Instagram Plus“ и „WhatsApp Plus“ ќе понудат дополнителни функции за корисниците. Според информациите на „ТекКранч“, претплатите за Фејсбук и Инстаграм во САД ќе чинат по четири долари месечно и ќе бидат наменети за напредни корисници, овозможувајќи подобра контрола врз видливоста на содржините и подетални аналитички податоци за досегот на објавите.
Пакетот „WhatsApp Plus“, кој ќе чини три долари месечно, ќе биде фокусиран на персонализација и размена на пораки, со дополнителни теми, ексклузивни налепници и поголем број фиксирани разговори.
Во меѓувреме, Мета ќе започне тестирање и на платени претплати за својата платформа за вештачка интелигенција. Во Сингапур, Гватемала и Боливија следниот месец ќе бидат тестирани пакетите „Meta One Plus“ и „Meta One Premium“, чија цена во САД ќе изнесува осум, односно 20 долари месечно. Премиум-верзијата ќе нуди повисоки лимити за користење, додека основните функции на Мета АИ ќе останат бесплатни.
Компанијата најави и дополнителни пакети под називите „Meta One Essential“ и „Meta One Advanced“, кои ќе бидат насочени кон креатори на содржини и инфлуенсери. Овие претплати ќе вклучуваат верификуван статус и алатки за проширување на публиката на платформите на Мета.
