Министерот Агон Ферати денеска одржа средба со претставници на Министерството за внатрешни работи, Министерството за спорт, ОБСЕ, Фудбалската федерација на Македонија, фудбалски и кошаркарски клубови, како и со претставници на навивачките групи на албанските и македонските клубови.
На средбата се разговараше за состојбите и предизвиците поврзани со безбедноста на спортските терени и во спортските сали, како и за непреченото одржување на натпреварите. Посебно внимание било посветено на спречувањето инциденти, тензии и навреди врз етничка и верска основа.
Ферати ја нагласи потребата од постојана соработка меѓу институциите, спортските федерации, клубовите и навивачите, со цел стадионите и спортските сали да бидат места за спортско ривалство, почит и позитивна атмосфера.
„Можеме да бидеме ривали за време на натпреварот, но по неговото завршување сите се враќаме во истото општество. Силно навивање, гласна поддршка и спортско ривалство да – омраза и етнички и верски навреди не“, порача Ферати.
Тој истакна дека средбата треба да биде чекор кон изнаоѓање конкретни решенија и зајакнување на соработката меѓу сите засегнати страни за создавање побезбедна и попочитувана атмосфера во спортот.
